L’asturianismu críticu d’Hevia
Quiero falar del discursu de José Ángel Hevia nel Campoamor con motivu del Día les Lletres, el más clarificador y autocríticu qu’escuché en bastante tiempu de boca d’un asturianista. El gaiteru maliayu vieno a dicir: esto acábase, ¿preocupa-y a daquién?
La conclusión a la que llega Hevia ye que non. Nel ámbitu políticu, tenemos a les sigles mayoritaries (col matiz d’IX), que viven ayenes al problema, o más bien enfotaes n’acelerar el procesu desasturianizador. D’otra banda, los grupos o grupinos, estremaos, dixebraos, equidistantes, ínfimos, que dicen representar al asturianismu politicu. La so propia disposición centrífuga retrátalos.
Pero hai más. Echar una güeyada a la rede ye calumbase nel ámbitu insólitu y sorprendente del ultramundu asturianista. Articulistes y foreros van a la tema na carrera por demostrar quién ye más xabazmente ayenu a la realidá cotidiana de los asturianos. Soberanismu, autodetermín, independencia, anticapitalismu, II, ANV, internacionalismu... son el santu y seña terminolóxicu d’una parte importante d’esi micromundu nacionalista. Tamién hai llamaes al aconceyamientu de sigles en pro d’una virtual y suañada realidá alternativa.
Permitíime un pequeñu siloxismu: Asturies ye conservadora y españolista; el nacionalismu asturianu soberanista y a la isquierda de la isquierda institucional; la conclusión ye ñidia: enxamás nun habrá coincidencia posible ente los asturianos y los grupos nacionalistes qu’anagüen por ‘lliberalos’.
Hai quien considera que la cuestión identitaria y llingüística nun ye oxetivu de suficiente caláu, nin aventura qu’aporte abonda adrenalina a les sos vides, por eso ye preciso venceyar tales reivindicaciones –con fecha de caducidá cierta y cercana- coles grandes asignatures pendientes de la isquierda radical y mundial: los movimientos urbanos, la antiglobalización, la fame nel mundu, la llei de partíos, l’anticapitalismu...
Por ciertu que too ello esplícase y deféndese en webs subvencionaes por un odiosu “gobiernu capitalista y socialdemócrata”, que da unes perruques nel marcu d’una Llei d’Usu aprobada pola “derechona” y “l’asturianismu rexonalista y claudicante”.
Lluis Portal. Suplementu Lletres de xunu (La Voz de Asturias)
Esbilla
del.icio.us
CR ye una asociación cultural enfotada na defensa y promoción de la Llingua Asturiana: del so usu públicu, de la so lliteratura, de los derechos de los falantes..., de la OFICIALIDÁ
"Hai quien considera que la cuestión identitaria y llingüística nun ye oxetivu de suficiente caláu".
Rotundamente cierto. Cada vegada s'apostalguen más estes cuestiones nuna fuxida hacia l'absurdu ya'l surrealismu políticos.
Qu'éntame Hevia por dar la cara pol so nome n'asturianu como faen munchos. Él ve la paya nel güeyu ayenu y nun ve la caña nel propiu... Que tien miéu a que Xosé Ánxel nun venda tanto como José Ángel? Eso nun ye compromisu nin ye nada, ye hipocresía, y encima académicu.. hai que tocase les ñarres....
"Tamién hai llamaes al aconceyamientu de sigles en pro d’una virtual y suañada realidá alternativa." Si esos llamaos a la xuntanza dieren frutu granible (cosa que nun sé, por ciertu) polo menos acabaríase la ceremonia de confusión qu´entama Gabino de Lorenzo cola so "Fundación pro-bable", Felechosa, y demás fichaxes pa engañar a bobos. Meyor una xuntanza de pocos qu´un TRANSVERSALISMU qu´en realidá amazcara el proxectu derechista y español d´entierrar pa siempres l´asturianu. Un saludu pa la Villa, que tamién ye mio tierra y de mios ancestros.
En cuantes a Beni y Hevia, hai que respetar la manera como quiera llamase caún ¿nun te paez? Háilu que se cambió´l nome y ye más español qu´un toreru. Ye mio opinión namás.
Esti tipu d'argumentos, espresaos baxo'l mantu d'impunidá qu'ofrez l'anonimatu (una de les acepciones d'hipócrita ye "el que nun da la cara"), ayuden a comprender por qué les coses tán como tán. Por supuesto, nun voi a defender a José Ángel Hevia, porque ello sería un atrevimientu pela mio parte, solo voi a dicite que nun conozo a nenguna persona qu'hebia fexo más pola cultura asturiana.
Un saludu, Carlos, y gracies pol tonu.
Saludus
Solo una puntualización Nireblog no es una web subvencionaes por un odiosu “gobiernu capitalista y socialdemócrata”
Enhorabuena por el Blog.