LA COMPAÑA DEL RONCHEL

Nun futuru, y posible, diccionariu conceptual d’Asturies (d’esos que tantu vemos agora peles llibreríes), la pallabra caborniu debiere tener una entrada señalada. Caborniu ye una voz bable que deriva del llatín ‘cavernam’ y significa ‘tueru vieyu y güecu d’un árbol’. Milenta topónimos, dende les rases de Peñes a los montes de L.lena y de El Franco a Siero, anuncien la so bayura: El Caborniu, El Cabornín, El Cabornu, As Cabornas, Los Cagüernos… N’Oriente y pel conceyu de Maliayo úsase la pallabra cuévanu. Sin embargu en Samartín de Vallés consérvase el topónimu La Cabornia, que mos recuerda l’emplegu antigüu d’esa voz peles nueses parroquies.

Atopar cabornios peles aldees yera más fácil anantes. Nos años cuarenta la sociedá catalana ECNESA (Extractos Curtientes del Norte d’España) istaló en La Cardosa, Grau, una fábrica pa facer tintes, llíquidos pa curtir y pintures qu’acabare con munchos cabornios per toa Asturies, al usar la maera les castañales pa sacar los estractos tánicos. Funcionó hasta los años setenta y agora, coses de la vida, nuna de les sos vieyes naves ta asitiáu el Muséu Etnográficu de Grau.

Si hubiere qu’escoyer un llugar matricial, aniciu y alegoría del muncu asturianu, pa mín esi taría nes coraes prietes d’un caborniu. Oratoriu d’ánimes, ñeru de trasgos y sacaberes, úteru fecundu, puerte mistérica,… el caborniu ye’l relicariu natural de lo sagrao: n’élli alcuéntrase l’incosciente colectivu astur, tolo que mos xunta dende’l principiu los díes. La mar y les montañes son los espacios sagraos d’Asturies, onde’l Panteísmu mos ablaya, pero ye nes viesques mestes de los valles onde s’atoparen el Caborniu y el Pueblu Asturianu.

Frente a los fúnebres texos y lloreos el caborniu d’una castañal, nutricia y materna, afítase como’l nuesu Árbol de la Vida. Amesta lo soterraño y el cielu, ye la respuesta asturiana al arquetipo del morrer y el resurdir. Emprencipia cola creación del mundu y acaba nel fin de les edaes: simboliza la continuidá d’una civilización a lo llargo’l tiempu: alfa y omega. Hai munches pruebes d’esti arquetipo a lo llargo la humanidá: nel cristianismu l’árbol de la vida del Paraísu tresfórmase na cruz del Gólgota; L’Islam tien el so árbol edénicu llamáu Turga; Disneylandia, n’Orlando, con un descomanáu árbol sintéticu qu’ente los sos raigaños tien un espectáculo multimedia; l’ancina druídica; el poste d’abeduriu de los indios les praderes americanes, llantáu metanes un tipi como árbol cósmicu; l’árbol científicu de Darwin, onde enfilandraes apaecen les especies animales o el mesmu árbol de Navidá, importáu n’España dende la Europa de la Protesta.

Cuando Deméter, la diosa arquetípica de l’Agricultura occidental, enseñó al home a domesticar la naturaleza, el caborniu, columna y sagrariu, asitióse metanes la quintana y domesticáu fízose horru; exa del mundu aldeanu, tótem de castañu llantáu na corrada, onde la xeometría humana impúsose a la retorcigañada naturaleza. El so tueru multiplicáu entamó nel solhorru un peristilo, el güecu camudó en tabernáculo y la garamita en pirámide. En toles civilizaciones sagrariu y graneru tan perrelacionaos; en llatín nómbrense cola mesma pallabra: ‘cella’, y en Xapón los santuarios nacionales d’Ise y Izumo son graneros d’arroz camudaos en templu pel sieglu VIII.

La cultura asturiana medró perriba la viesca. L’hachu y el llabiegu fueren los aperios que coraren el valle faciéndolu Aldea. D’esos trabayos antrópicos xurdió Asturies, que ye una y mil, idéntica y estremada na so mesma infinitú, onde la relación caborniu-horru simboliza la colonización pel home de la Naturaleza.

Llector: cuando camines pente les fúnebres solombres d’un castañéu y alcuentres de sópitu’l sagrariu místicu d’un caborniu, recuerda: ¡ehí alenda l’espíritu sagráu de la Patria!

Xuan Pedrayes Obaya

VILLAVICIOSA