LA COMPAÑA DEL RONCHEL

            Como villaviciosinos, como asturianos, como demócrates, pidimos, nesti momentu en que se planifica la reforma del Estatutu d’Autonomía d’Asturies, a los nuestros representantes políticos, la responsabilidá necesaria p’aprovechar esti momentu históricu nel sen de garantizar los derechos de tolos asturianos. Nun puede pasar esta oportunidá sin oficializar la llingua asturiana, única ferramienta decisiva pa mantener viva la espresión fonda y auténtica de la nuestra cultura; amás de garantizar la llibertá y la igualdá de tolos ciudadanos que vivmos n’Asturies.

            Pidimos a los nuestros políticos que nun planteen una reforma de compromisu, o basándose n’intereses ayenos a los de los asturianos y la so cultura, sinon que tengan la sensibilidá precisa y l’altura de mires necesaria p’aprovechar la oportunidá que nos brinda a toos esta reforma pa equiparar los derechos de los asturiano-parlantes a los de cualisquier otra comunidá billingüe d’España (Galicia, País Vascu, Navarra, Cataluña,  Valle d’Arán, Valencia o Baleares).

            Ye mester cumplir el mandatu del artículu 3 de la Constitución Española, y avanzar sobre lo establecío na Llei d’Usu del Asturianu, qu’enllana’l camín al reconocimientu oficial del bable. Por eso nos esmolecen los planes de los grupos mayoritarios de facer una reforma en falso, de puru compromisu, sin conteníu real, que nun solo vuelve a dexar de llau el tema de la oficialidá, sinon qu’inclusu supón un retrocesu nel sen de ñegar al bable un estatus de llingua pa terminar equiparándonos a los dialectos castellanos como el ‘panocho’ murcianu.

            Tratar al asturianu como una ‘modalidá llingüística’ sería un grabísimu retrocesu, volviendo a la última dómina del franquismu, en que’l dictador decidió proceder a supuestu ‘reconocimientu’ de puru compromisu a la “riqueza llingüística” del país. Solo hai un camín, y ési ye’l de la oficialidá. ¡Nun queremos paternalismos, sinon el reconocimientu de los nuestros derechos!

                                                           Asociación El Ronchel

                                                           Villaviciosa  

Esbilla | del.icio.us