LA COMPAÑA DEL RONCHEL villaviciosa-asturies

La escritora marroquí Najat el Hachmi (Nador 1979), acaba de ganar el Premiu de les Lletres Catalanes cola so obra L’ultim patriarca. Najat, que s’afincó na localidá barcelonesa de Vic cola so familia cuando tenía solo ocho años, ye un exemplu d’integración cultural, una demostración de que la sociedá catalana, en definitiva qu’un pueblu pequeñu con abondos problemes d’afitamientu identitariu, receptor tradicional d’emigrantes, ye quien a acoyer y asimilar a esos nuevos ciudadanos ensin complexos, con imaxinación, utilizando la suxerencia como forma de convivencia renovada y dinámica. Evitando la xenofobia.
Nun ye una situación idílica. El Raval, sin dir más lloñe, cuyes cais transito estos dis con manifiesta incredulidá, convirtióse fai tiempu nun guetu nel que s’apinen foriatos d’estremaes procedencies -pero sobre tou de países musulmanes-, en cases vieyes y precaries, con balcones mantiaos de ropa tendío al sol, abondos rapacinos... Mécense equí colos marxinales orixinarios d’esti inmensu patiu traseru barcelonés: esquilfes, drogadictos, méndigos...
Pero Najat ye d’esi grupu integráu –ella mesma trabayó un tiempu como intermediaria cultural-, que se siente catalán, que participa de les mesmes esmoliciones y allegríes que los nativos del país ensin renunciar necesariamente a la propia identidá o a la de la so familia, a la del país d’orixen.
Nun momentu como l’actual nel que tantos intereses parecen confluir nuna espiral d’enfrentamientu fanáticu, hai exemplos almirables, como’l de Najat, qu’abren ventanes a esi xardín floríu que llamamos esperanza. Ella, a diferencia de tantos emigrantes arranaos por meyorar les sos condiciones de vida miserables, por sobrevivir simplemente, tuvo oportunidá de formase y crear un ñeru nel so interior nel que se caldia un ampliu catálogu de deseos, estableciendo prioridaes más allá de la pura subsistencia.
La cultura ye’l principal antídotu contra la xenofobia, y tamién contra la resistencia a la integración nel país d’acoyida. Najat dióse cuenta aína que la dicotomía propio/ayeno deriva nuna simplificación innecesaria, qu’empobrez a les colectividaes y tamién a les persones individuales y esterilícenles pa poder pensar y vivir llibremente, pa progresar y enriquecese cola esperiencia de los demás.
Pa la escritora marroquí nun ye un conflictu escribir en llingua catalana, tolo contrario. Precisamente, acaba de declarar nuna entrevista que pa ella la lliteratura ye un mediu de xuntar los gañipos espardíos de los munchos mundos diferentes nos que vive. La lliteratura ye una esperiencia en sí mesma y, otramiente, el mediu pa reflexonar sobre conflictos como’l xeneracional qu’aborda de forma brillante na obra cola qu’acaba de ganar el premiu Ramón Llull, y que ye la so segunda creación d’ésitu, dempués de que viera la lluz Jo també soc catalana.
Suplementu LLETRES. Mayu 2008. Lluís Portal. LA VOZ DE ASTURIAS

ronchel @ 23:09
Esbilla | del.icio.us