LA COMPAÑA DEL RONCHEL

Vaqueirada, Axuntábense y Villaviciosa hermosa. Esi fui’l menú del reestrenu del Teatru Riera, a cargu de la Coral Capilla de la Torre, rematáu col Himnu d’Asturies. Sonaron les sos voces corales a música celestial, non solo pola magnífica interpretación –a lo que nos tienen ya avezaos- sinon tamién porque sonaben nel Riera. Pasaron cinco años desque Maliayo Teatro punxo n’escena ‘L’avaru’ de Molière, y del cierre penosu y triste del coliséu local dempués de sesenta y tantos años de prestar un impagable serviciu al vecindariu viciosín.

Complicaciones técniques
Como si d’un xubiláu se tratara, el Riera preslló les puertes ente la más absoluta incertidume. Lluego llegó la noticia feliz de la compra y el proyectu de remoción nel que s’implicaron tres alministraciones: estatal, autonómica y local-comarcal. Dos arquitectos mozos de La Villa ganaron el concursu d’idees afrontando d’una forma razonable les contradicciones cásique insalvables del concursu: había que rehabilitar el teatru, facer un centru de visitantes y una sala d’esposición sobre’l acebache.
Llocura tala solo se pudo ‘salvar’ con un vaciáu del subsuelu de la plaza. Problemes de cimentación impidieron facer una entrada desde’l teatru y llegó l’enguedeyu de la escalera y el casetón del ascensor. Sorprendentemente, la tan estricta Comisión del Principáu dio’l so ‘nihil obstat’ al proyectu, qu’incluía tamién un stand turísticu allugáu xusto detrás del ábside románicu de La Oliva.

Menos aforu, más dotación técnica
Con 260 cómodes butaques y 20 silles de palcu, l’aforu del Riera sufre una cierta reducción pero gana en comodidá. Un espertu na materia, José Luis Campa, da’l vistu buenu a les nueves instalaciones: “El teatru ye una maravilla”. Pártese d’una base que ye la esistencia d’una sala pequeña pero proporcionada y de gran estética que se mantuvo mayormente como taba. Campa critica’l color escesivamente claru de les parés porque brilla na escuridá y les subideres del escenariu, si bien esto último tien solución colocándose unes tapes durante les representaciones.
Destaca’l responsable de Contraste –cuyu grupu conoz de primera mano les instalaciones pola so participación nel pregón del Portal- de forma especial los equipos técnicos con que se dotó al teatru: “Les meses de lluces y soníu son superiores a les de munchos teatros que conozco, y de cases solventes”. Empondera especialmente la illuminación del escenariu. Da’l vistu buenu a los camerinos, que siempre se podríen ampliar a costa de la sala-almacén qu’hai al llau, casu de necesidá, aunque hai que tener en cuenta que se trata d’una instalación proporcionada al teatru.
“Tou ye meyorable, pero estéticamente ye una sala mui guapa y con posibilidaes”, remata Campa, cuya compañía estrenará equí los dis 11, 12 y 13 d’ochobre ‘La ciudad sitiada’. Supongo que pa entós habrá una taquilla y personal que llimpie y acomode; vamos, que llegue la normalidá. Pa entós debería de tenese ya un plan de xestión del teatru. Tiempu al tiempu.

Lluís Portal
El Fielato 17.09.08

Pocu a pocu va iguándose la toponimia del conceyu. Los nuevos rétulos inclúin los nomes tradicionales de los pueblos y barrios, anque delles veces nun se retiren, inesplicablemente, los vieyos, magar que tean esfarrapaos, como ye'l casu d'ésti, asitiáu nun cruce cercanu a Sanzornín (Pueyes). Tamién se debería tener un pocu más de procuru a la hora de confeccionar los nuevos indicadores n'evitación d'errores como'l d'escribir separao San Zornín, o Vallina Oscura, cuando se trata -nel segundu casu- d'una forma que nun cambió respectu a la que yera oficial anteriormente. Per otru llau, desde equí reclamamos más coordinación cola Mancomunidá y otros organismos oficiales pa que cuando se coloque cualisquier indicador nuevu, anque seya de madera, como'l de la fuente de Sanzornín, se fagan les coses bien. Ta avanzándose tamién na normalización cartográfica y la cartelería, y siguen siendo un mundu aparte los medios de comunicación.

----------------------------------------------------------------------

El Certame de Sidra Casero de Villaviciosa ridió-y un homenaxe a la figura de Mundo Collada. Enólogu, edil, asturianista, Mundo yera una persona mui apreciada en La Villa. La Plaza del Güevu enllenóse p'asistir a los actos programaos. El xerente de la firma Valle, Ballina y Fernández entregó-y a la vilba de Mundo una talla de madera de Pablo Maojo, y l'Ayuntamientu descubrió una placa nel centru cultural de Capistrano.
-----------------------------------------------------------------

Quiero entamar agradeciendo -en nombre de familiares, compañeros y amigos- a la organización d’esti eventu sidreru’l recordaroriu que-y decidieron dedicar a Mundo Collada García, y el qu’un pocu más tardi fará’l consistoriu en Capistrano. Nun sé si soi la persona más afayaíza pa dicir algo sobre Mundo, en cualquier casu nun soi la persona neutral que quiciás debería facer una glosa dél creíble y axustada a la realidá na medida de lo posible.
¿Qué se puede dicir de forma ‘aséptica’ d’un compañeru, d’un amigu desaparecíu, amás, prematuramente? Yo solo tengo hacia él palabres d’almiración y cariñu. Pa mi y pa munchos la desaparición de Mundo dexó un güecu grande y mui difícil d´ocupar.
Puedo dicir que yera una persona que desde bien ceo demostró ser consciente de la tierra que pisaba. Un home con principios y conciencia social, lo que lu llevó a participar nel movimientu vecinal, a trabayar nel Atenéu Obreru -que llegaría a presidir-, a fundar el colectivu Albentestate va facer agora 25 años, a formar parte de la corporación local, demostrando nesi complicáu llabor una dignidá y honradez pocu usuales.
El sentíu común y la ironía conformaben el so perfil característicu, un carácter qu’envolvía a los que s’acercaben a él y nos seducía a toos. Pero bueno... éstes quizá son palabres que remanecen de la amistanza y la señaldá...
Hai otres coses más ‘oxetives’ seguramente que se pueden dicir de Mundo Collada equí, nel contestu d’esti certame sidreru. Hubo una época en que pocos apostaben pola evolución de la sidra, pola presencia de técnicos nos llagares, pola aplicación de les nueves tecnoloxíes al procesu d’ellaboración de la nuestra bebida. Mundo defendió siempre la necesidá de qu’esti sector ancestral evolucionase sin perder por ello l’autenticidá nin el sellu de lo tradicional.
Pocu tien que ver el panorama sidreru actual col de fai quince años y el cambiu –qu’él celebraba-, por supuestu a meyor. Cambios nes bodegues grandes y nos llagares pequeños: etiquetes, corchos, botelles, prenses, depósitos, selección de la mazana... Tou cambió en pocu tiempu, sin que por ello se perdiera la sencia de dalgo tan nuestro.
Pero l’abellugu dél, el so escondite preferíu nun yeren les grandes bodegues industriales sinon un pequeñu y modestu llagar caseru. La foto del cartel d’esti certame de Mundo col vasu de sidre na mano ye’l semeyu que bien podría reflexar una tarde prebando toneles en cualquier requexu de cualquier pueblu, de cualquier quintana perdida, de cualquier casería del conceyu de Villaviciosa, en Fuentes o en Seli, en Villar de Tornón o en Miravalles, en Poreñu o en San Xusto.
Esa estampa al pie d’una barrica, d’un bocoi o d’un tonel de varies pipes... nun llagar solombriegu y húmedu a matatarrén, arrecendiendo a madera de castañu empapáu en sidre, al mugor de la piedra, pisando un suelu de cementu o de tierra, conxurando tastos y filaos, persiguiendo’l bon espalme, el secante, el granu, l’amarguín...; catando’l color apropiáu, el bon vasu, el sabor razonable, la nobleza de la última producción...
Recuerdo tardes entrañables nel llagar de Llavanderu xunto a toneles con nombre propiu: Panecillu, Viciayu..., con conversación o con gaita inclusu: Hevia, Fernando Montes..., o les dos coses. Recuerdo a Mundo arrecendiendo la sidra como un cuzu peñerando l’aire que captaba’l so olfatu, manteniéndolo na boca, averándolo al paladar..., calculando equilibrios de sabores, tabulando de memoria acideces y dulzores, evaluando dexes, afilvanando sencies, esmorgando palos y fustes, catando’l gustu más escondíu y el regustu menos afianzáu.
La de Mundo yera, más que dedicación, devoción pola la sidra, incrementada de forma esponencial ante’l dominiu de les técniques, el conocimientu de les propiedaes, la práctica de la cata rigurosa y profesional.
Nun voi allargame más.
Nesti momentu imaxino a Mundo equí delantre, nesta plaza d’El Güevu, mezcláu ente’l públicu con xestu divertíu, con una sonrisa irónica na mirada, ensayando veyures, pensando en qué facemos ‘perdiendo’’l tiempu falando dél, pudiendo tar tomando unos culinos de sidra. Por eso quiero terminar pidiendo que los prósimos culinos que se tomen nesta plaza se dediquen a la memoria de Mundo Collada; nengún homenaxe podría ser más auténticu, nada-y prestaría más a él nin a mí.
Munches gracies.

Lluís Portal Hevia
Plaza’l Güevu, 24-08-08
Festival de la Sidra Casero

El día 19 de xunetu celebróse en Villaviciosa el Festival de Bandes de Gaites, nel que participaron formaciones de Lorca (Murcia), Ponferrada (El Bierzo), Lorient (Bretaña) y Villaviciosa. Nel trescursu de los actos tuvo llugar un homenaxe a los músicos tradicionales na persona de Tino Gancedo, d’El Puntal, qu’a los sos 80 años sigue tocando acompañáu de Pedro Balbín en munches fiestes maliayes. La muyer, Celsa, de 79, demostró na espicha posterior, que ye una gran cantante de tonada.

           Intervención de Lluís Portal:

El Festival de Bandes de Gaites de Villaviciosa vístese esti añu de fiesta y tíñese de señaldá pa recordar a los músicos tradicionales. Cuantayá que taba pendiente un reconocimientu públicu y multitudinariu como esta andecha de gaites, esta folixa de roncones procedentes de distintos puntos de la nuestra realidá atlántica, esti doblar de tambores antiguos... Ye’l sitiu y el momentu de falar con lletres doraes de los grandes y de los pequeños –sobre tou d’estos últimos-, de los famosos y de los cásique anónimos gaiteros d’Asturies, de los músicos de la Comarca de la Sidra y de los maliayos...

Nun pretende ser un reconocimientu individual nin pormenorizáu, ye un recordatoriu a los que nos tresmitieron el saber, la tradición, l’aire de los sos barquinos vitales, los sones d’un país que tien la so propia banda sonora, el so propiu rítmu, la so propia capacidá pal ritu y la ceremonia, y tamién la propia y estremada cornamusa fecha de fiesta y sentimientu.

Nun solo tienen sitiu nel Olimpu de los músicos los gaiteros grandes como Lliberdón, el primeru que grabó en pizarra, que tocó y cantó y esportó lo asturiano a Europa y América; hubo músicos gayasperos como Aladino d’Amandi, qu’amás d’interpretar posó pal futuru y dignificó la gaita y al músicu; gaiteros-indianos como Moriyón, de Seloriu, qu’animaba cola so singular instrimentu les tardes selectes del Café Tortoni de Buenos Aires; prolíficos como José Vega, el gaiteru de La Madrera, que tantes veces crució esta plaza del Mercáu Vieyu calzáu coles sos madreñes de clavos... Pero tamién de tantos y tantos que chiflaron, qu’adoraron, que mansuñaron, qu’odiaron, qu’acoricaron, qu’añaron, qu’empuñaron con sentimientu profundu esti argadiellu afináu -o desafináu- que llamamos gaita y que ye’l pulmón vital de los asturianos d’ayer y de güei.   

Dicen en La Bretaña que “mientres hebia mar, esistirán los bretones”, podemos dicir que mientres hebia gaiteros esistirá Asturies.

Nun debe ser ésti l’únicu día que se dedique a los nuestros músicos, la memoria de los que nos precedieron debe alendar, alienda realmente a bocaraes cada vez que la nota d’una gaita, grave o fina, murnia o allegre se llanza al aire; cada vez que suena una marcha fúnebre, s’esboza una danza atávica o s’ensaya una pieza festiva.   

Ye un día pa recordar a los gaiteros ya desaparecíos pero tamién a los que tóvia conviven con nós y que foron los últimos habitantes del desiertu, un ermu esistencial que güei, por suerte, ya superamos.

Nun ye un día pa mirar atrás remembrando la precariedá, la falta de reconocimientu del músicu, el ruín apreciu, la escasa paga, l’olvidu... que cásique acaben con ésti instrumentu, porque anque nun hai qu’olvidar d’onde procedemos ye obligación nuestra mirar hacia alantre. La gaita naz cada día como’l sol y busca’l so sitiu ente’l restu los planetes, nel abanicu de los instrumentos del mundu, de la música d’un país nel qu’una melodía afilvana cada día la tierra y la mar, una mar céltica que nos xunce con un territoriu sin llendes que sabe a salitre y que ta fechu, como la gaita, de vientu y señaldá.

Una llapa permanente debería arder nesta plaza en memoria del ‘gaiteru anónimu’; mientres esto ocurre, lo más parecío al calor d’esa llaparada ye la enerxía de los que tamos equí concentraos, el cariñu y el reconocimientu que queremos demostrar a los músicos, a los constructores de gaites, a esa xente que tresmitió’l so saber desinteresadamente, amorosiegamente, fervientemente, a les xeneraciones posteriores, el gustu pola música, el procuru hacia’l detalle, hacia la singularidá, el deséu de superación, l’esfuerzu por meyorar.

Que nun caiguen nel olvidu los gaiteros. Pero sobre tou qu’enxamás s’escaeza a los gaiteros y tamboriteros de siempre: la so aportación, la so música; que nun s’escaeza que la gaita ye l’alma d’un pueblu fechu d’orbayu y borrín, que nun s’escaeza que la gaita ye l’alma d’Asturies, y el gaiteru l’intérprete supremu del so sentimientu.

Munches gracies.

NA PÁXINA www.doilacara.net puedes atopar información sobre esta campaña entamada pol Conceyu Abiertu pola Oficialidá (CAO), a la que se tán sumando ya cientos de persones de dientro y fuera d'Asturies. Ye cenciello: trátase de baxar el testu 'Yo doi la cara pol asturianu', tires un semeyu con él y mándeslu a la dirección doilacara@gmail.com. Puede facelo tol mundu -adultos, ñeños solos nun ye recomendable-, y nel idioma que pete, sumándose a esta campaña al traviés d'una web na que van saliendo tolos retratos. ¡Anímate y participa, tú sumes!

EL RONCHEL foi invitáu a participar na Comision de Toponimia convocada pol alcalde maliayu Manuel Busto pa modificar los nomes de places con denominaciones franquistes, corrixir errores y 'bautizar' les zones d'espansión, el nuevu ensanche. Con tolos inconvenientes y dificultaes que surdieron, consideramos positiva la nuestra participación nesti organismu ciudadanu nel que tamién s'integraron asociaciones culturales, vecinales, de muyeres, de xubilaos y los partíos políticos que funcionen nel conceyu, amás de dos miembros a títulu personal. Los trabayos de la comisión ta a puntu de finar. Agora tóca-yos el turnu a los grupos muicipales, ya que ye la corporación la que tien la última pallabra, de toes formes los grupos reconocieron en so día que'l dictame de la comisión yera vinculante. El Ronchel defendió les denominaciones tradicionales ellí onde taben olvidaes y denominaciones con raigañu local pal restu.
Esti trabayu súmase al fechu pola Xunta de Toponimia de revisión de los nomes de sitios habitaos del conceyu, y que foi aprobada pel conceyu y ratificada pol Conseyu de Gobiernu del Principáu. Esperamos que pasín ente pasu se normalice tamién nos indicadores,l'usu institucional, nos medios de comunicación y la propia sociedá.

L'ASOCIACIÓN entamó una campaña col lema Comprométite col asturianu, que consistió na publicación de mil calendarios con esi lema repartíos per distintos organismos y establecimientos maliayos. Con esta campaña queremos afitar la necesidá de comprometese col nuestru idioma de forma activa en toles estayes y por tolos actores sociales.

APROSÍMASE esi momentu esperáu de la reapertura del Teatru Riera. Pienso ya nesi primer día nel qu’accederemos al so interior con cierta precaución. Costarános atopar les coses y, de xuru que nos asaltará más d’un recuerdu, porque esa ye la forma en que los humanos rellenamos los espacios vacíos de la historia. Echaremos en falta la cara atenta de Cándido Cambiella pendiente de les bambalines. Julia cola llinterna parándo-y los pies a los guajes revolvinos. El ambigú de les llambionaes, que solo a última hora se rindió a la moda de les palomites...
Será ilusionante volver a ver abiertu’l Riera, una emoción asemeyada a aquella de la sesión infantil de cine de les tardes domingueres, de los festivales del San Francisco, del cine corriente y de los grandes estrenos multitudinarios que permanecieron dis y dis na cartelera –¡increíbles carteleres pintaes a mano por Cándido!-, de la llegada del cine picante... De los estrenos teatrales de les compañíes madrileñes, de los primeros pasos de Contraste, de los actos lliterarios –y un pocu decimonónicos- de les Fiestes del Portal, del brillante actu d’homenaxe a Luis David, ‘El Panecillu’, por parte de Jurado y Nuria.
Recuerdo un teatru atarraquináu de xente de l’aldea organizando una fuelga de la mazana. Diéronse mítines políticos, recitales poéticos, les conferencies del quintu centenariu de Carlos I, recitales de canción asturiana... Ellí cantó Beleño per primera vez na villa pa cuatro gatos, y Bibí Anderson pa unos cuantos pavos morbosos más.
Pero’l ‘nuevu’ Riera nun nos defraudará. Ehí ta viendo pasar el tiempu, como los edificios con alma y les instituciones importantes. Ehí siguirá’l Riera gracies a la compra y la remoción d’un teatru que tendrá munches más tardes de gloria, y mañanes... El Riera continuará dándonos emociones, recordándonos retayos de la nuestra propia vida, de la nuestra identidá, porque gracies a esti llugar emblemáticu somos un pocu más grandes, un pocu más cultos. Lo que toca pidir nesti momentu ye un funcionamientu permanente, una programación teatral importante, y un protagonismu significativu de los grupos teatrales maliayos na nueva vida del Riera renováu.