LA COMPAÑA DEL RONCHEL

El día 19 de xunetu celebróse en Villaviciosa el Festival de Bandes de Gaites, nel que participaron formaciones de Lorca (Murcia), Ponferrada (El Bierzo), Lorient (Bretaña) y Villaviciosa. Nel trescursu de los actos tuvo llugar un homenaxe a los músicos tradicionales na persona de Tino Gancedo, d’El Puntal, qu’a los sos 80 años sigue tocando acompañáu de Pedro Balbín en munches fiestes maliayes. La muyer, Celsa, de 79, demostró na espicha posterior, que ye una gran cantante de tonada.

           Intervención de Lluís Portal:

El Festival de Bandes de Gaites de Villaviciosa vístese esti añu de fiesta y tíñese de señaldá pa recordar a los músicos tradicionales. Cuantayá que taba pendiente un reconocimientu públicu y multitudinariu como esta andecha de gaites, esta folixa de roncones procedentes de distintos puntos de la nuestra realidá atlántica, esti doblar de tambores antiguos... Ye’l sitiu y el momentu de falar con lletres doraes de los grandes y de los pequeños –sobre tou d’estos últimos-, de los famosos y de los cásique anónimos gaiteros d’Asturies, de los músicos de la Comarca de la Sidra y de los maliayos...

Nun pretende ser un reconocimientu individual nin pormenorizáu, ye un recordatoriu a los que nos tresmitieron el saber, la tradición, l’aire de los sos barquinos vitales, los sones d’un país que tien la so propia banda sonora, el so propiu rítmu, la so propia capacidá pal ritu y la ceremonia, y tamién la propia y estremada cornamusa fecha de fiesta y sentimientu.

Nun solo tienen sitiu nel Olimpu de los músicos los gaiteros grandes como Lliberdón, el primeru que grabó en pizarra, que tocó y cantó y esportó lo asturiano a Europa y América; hubo músicos gayasperos como Aladino d’Amandi, qu’amás d’interpretar posó pal futuru y dignificó la gaita y al músicu; gaiteros-indianos como Moriyón, de Seloriu, qu’animaba cola so singular instrimentu les tardes selectes del Café Tortoni de Buenos Aires; prolíficos como José Vega, el gaiteru de La Madrera, que tantes veces crució esta plaza del Mercáu Vieyu calzáu coles sos madreñes de clavos... Pero tamién de tantos y tantos que chiflaron, qu’adoraron, que mansuñaron, qu’odiaron, qu’acoricaron, qu’añaron, qu’empuñaron con sentimientu profundu esti argadiellu afináu -o desafináu- que llamamos gaita y que ye’l pulmón vital de los asturianos d’ayer y de güei.   

Dicen en La Bretaña que “mientres hebia mar, esistirán los bretones”, podemos dicir que mientres hebia gaiteros esistirá Asturies.

Nun debe ser ésti l’únicu día que se dedique a los nuestros músicos, la memoria de los que nos precedieron debe alendar, alienda realmente a bocaraes cada vez que la nota d’una gaita, grave o fina, murnia o allegre se llanza al aire; cada vez que suena una marcha fúnebre, s’esboza una danza atávica o s’ensaya una pieza festiva.   

Ye un día pa recordar a los gaiteros ya desaparecíos pero tamién a los que tóvia conviven con nós y que foron los últimos habitantes del desiertu, un ermu esistencial que güei, por suerte, ya superamos.

Nun ye un día pa mirar atrás remembrando la precariedá, la falta de reconocimientu del músicu, el ruín apreciu, la escasa paga, l’olvidu... que cásique acaben con ésti instrumentu, porque anque nun hai qu’olvidar d’onde procedemos ye obligación nuestra mirar hacia alantre. La gaita naz cada día como’l sol y busca’l so sitiu ente’l restu los planetes, nel abanicu de los instrumentos del mundu, de la música d’un país nel qu’una melodía afilvana cada día la tierra y la mar, una mar céltica que nos xunce con un territoriu sin llendes que sabe a salitre y que ta fechu, como la gaita, de vientu y señaldá.

Una llapa permanente debería arder nesta plaza en memoria del ‘gaiteru anónimu’; mientres esto ocurre, lo más parecío al calor d’esa llaparada ye la enerxía de los que tamos equí concentraos, el cariñu y el reconocimientu que queremos demostrar a los músicos, a los constructores de gaites, a esa xente que tresmitió’l so saber desinteresadamente, amorosiegamente, fervientemente, a les xeneraciones posteriores, el gustu pola música, el procuru hacia’l detalle, hacia la singularidá, el deséu de superación, l’esfuerzu por meyorar.

Que nun caiguen nel olvidu los gaiteros. Pero sobre tou qu’enxamás s’escaeza a los gaiteros y tamboriteros de siempre: la so aportación, la so música; que nun s’escaeza que la gaita ye l’alma d’un pueblu fechu d’orbayu y borrín, que nun s’escaeza que la gaita ye l’alma d’Asturies, y el gaiteru l’intérprete supremu del so sentimientu.

Munches gracies.